Persunas d'instrucziun da classa els divers loghens da scola

Questa pagina vegn actualisada, ella ei a disposiziun las proximas jamnas cullas informaziuns pli novas.

Gl’onn ch’igl affon cumplenescha siu tschunavel di da naschientscha entscheiva el per regla la scoletta. Il lungatg d’instrucziun en scoletta ei il romontsch sursilvan. Per affons da lungatgs jasters ei la viseta tenor las directivas cantunalas obligatorica.

Duront ch’els absolvan ils dus onns da scola ella scoletta sesarvan als affons in niev spazi da viver, da termagliar e d’experientschas. Quel meina els en in ambient social slargiau, cun novs pensums e novas sfidas. A moda ludica survegn Vies affon impuls e promoziun per siu svilup corporal, mental, social ed emoziunal. Leutier fan ils affons l’experientscha dil termagliar ed emprender sco ina unitad.

Las scolettas vegnan menadas sco classas cumbinadas. Quei munta che affons da duas annadas fuorman mintgamai ina classa.

La direcziun dalla scola reparta ils affons sillas classas cun trer la sort. Giavischs san buca vegnir risguardai.

Ils emprems dus onns dalla scola primara frequentan ils affons a Falera. Ils proxims quater onns lu a Laax.

Duront quei temps s’engrondescha buca mo il radius da semover dils affons. Els sviluppeschan lur contacts, fan novas amicezias e s’approfundan cuntinuadamein lur habilitads e cumpetenzas els divers roms. Las scolaras ed ils scolars surprendan era adina dapli responsabladad per sesez e pigl emprender.

Las scolaras ed ils scolars da tuttas quater vischnauncas dil Consorzi frequentan il scalem superiur a Laax. Quel cuozza treis onns ed includa la scola reala e secundara.

Il scalem superiur vegn menaus tenor il model C che s’orientescha tenor la prestaziun. Quei munta ch’ils roms romontsch, tudestg, matematica ed engles vegnan purschi il medem mument per mintgamai duas gruppas da livel. Ils ulteriurs roms frequentan las scolaras ed ils scolars communablamein ella classa da tschep.

En quella fasa da lur veta s’orienteschan ils giuvenils pli ferm a lur amitgs, els sesligian pli e pli dils geniturs ed enqueran dapli autonomia. Il scalem superiur prepara las scolaras ed ils scolars sistematicamein silla veta professiunala e sin ulteriuras scolas.

La multifariadad dils roms vegn pli vasta, interess persunals san ins approfundir cun lavurs da project individualas e cun absolver roms libers. Ils giuvenils ein pli e pli habels d’emprender sur sesez ed en atgna responsabladad.

Pedagogas e pedagogs curativs da scola ein responsabels per scolaras e scolars cun basegns specials da formaziun e promoziun. El mintgadi scolastic portan els ina vasta paletta da cumpetenzas ed experientschas dallas qualas l’entira scola sa profitar.

Tier lur pensums s’audi da sustener ed assister sco era da registrar il stan d’emprender e da svilup da scolaras e scolars. Els promovan lur talents, fan plans da promoziun e rapports d’emprender. Plinavon adatteschan el il material d’instrucziun individualmein ad affons e giuvenils cun finamiras persunalisadas.

La collaboraziun cun e la cussegliaziun da persunal d’instrucziun sco era il svilup dalla scola el senn d’ina scola per tuts ei ina impurtonta part da lur lavur.

Era cussegliar scolaras e scolars sco era lur persunas da contact fa part da lur sectur da lavur.